Wasiir Yariisow oo sheegay in Nabaddoon xalay lagu dilay Wanllaweyn uu ahaa Al-shabab

 

28 Disheembere, 2017

 

Wasiirka Warfaafinta Xukuumadda Soomaaliya C/Raxmaan Cumar Cismaan Yariisow ayaa sheegay in Ciidamada gaarka ah ee Dowladda Soomaaliya ay xalay Degmada Wanllaweyn ku dileen sarkaal dhinaca Maaliyadda u qaabilsanaa Al-shabaab.

Wasiirka ayaa Bartiisa Facebook ku qoray in Nabaddoon Macallin Jeelle uu ka mid ahaa AL-shbaaab gaar ahaan qeybta Maaliyadda.

“xalay 27-Dec-2017.Ciidanka gaarka ah ee Soomaaliya ayaa howlgal gaar ah ka fuliyay Wanllaweyn,waxaa lagu doonayay in lagu soo qabto Nin Al-shabab maaliyadda u qaabilsan oo lagu magaaco Macallin Jeelle,waxaa uu diiday in uu isku dhiibo Ciidamada,iyada oo naftooda difaacaya ayuuna dhintay,waxaa ay doonayeen in ay nolosha ku qabtaan”.

Ehellada Nabaddoonka Xalay lagu dilay Wanllaweyn ayaa u sheegay Idaacadda Mustaqbal in Ciidamada dowladda ay weerar ku qaadeen guri uu ka degganaa Magaalada Wanllaweyn islamarkaana la toogtay.

Odayaasha uu nabaddoonka u ahaa Macallin Jeelle ayaa u sheegay Idaacadda Mustaqbal in Meydka Nabaddoonka la geeyay Garoonka Balli-doogle oo ah saldhigga Ciidamada xalay dilay,halkaasna ay Odayaasha iyo saraakiisha saldhigga ku wadahadlayaan.

Abaan duulaha Ciidanka Balli-Doogle Korneyl C/Salaan ayaa sheegay in uusan isaga joogin Saldhigga Xilliga weerarkaasi la qaadayay hayeeshee uu Afgooye ka baxay kuna sii socdo Saldhigga Balli-doogle oo ay ku suganyihiin Saraakiisha Ciidamada weerarka qaaday iyo odayaasha uu ka soo jeedo Nabaddoonka la dilay. – Somali Wayn Org

Leave a Reply